上次講咗招聘廣告「HR 揭祕！搵工遇著同一招聘廣告登完又登、冇公司名係咩原因？」同Send CV嘅常見問題「搵唔同工作要整不同版本？HR 解答6大CV及Cover Letter常見疑難」，今日就去到搵工第三步︰「Interview 前奏 」！
1. 如果我收到電話話有 Interview，但平日又行唔開，可唔可以建議喺放工時間後面試？
R.D. （國際獵頭公司 Recruiter）：要視乎僱主時間可唔可以，有啲公司可以彈性安排。
C 小姐 （香港大型企業 HR）：（我）公司唔中意。
2. 如果真係要 working hour 去，咁應該點樣同自己公司請假？
SW （香港企業面試官）：可以向公司請事假。
A sir （資深 IT Recruiter）：攞 annual 事假就最簡單。如果想詐病...風險請自己衡量。
3. 可唔可以分享3樣您認為最需要預備嘅 Interview 問答？
C 小姐 （香港大型企業 HR）：點解轉工、對公司嘅認識、下份工嘅目標。
Miss M （金融機構 HR）：自我介紹？點解你想轉工？你嘅工作經驗可以點樣幫到公司？亦可以分享難忘或者深刻嘅工作經驗。
R 姐姐 （公營機構 HR）：第一，自我介紹。準備一個準確嘅自我介紹，唔好太長唔好太短，用短短幾句說話可以形容到自己就最 Perfect。第二，想報呢份工嘅原因。呢個都一定係必問，所以一定要好好準備。第三，上一份工辭職嘅原因／CV空白期做咗嘅嘢。面試官都想透過你一啲過去嘅經歷評估下你係唔係適當嘅人選。
4. 去 Interview 嘅時候應該帶咩去？同埋著咩衫？
SW （香港企業面試官）：要 Print 定 CV 同埋 Portfolio；如果從事設計相關嘅工作，可以帶部 iPad 展示個人作品，show 返圖片、影片等等。如果職位唔係 Business Position，衣著斯文得體即可，唔需要過於 Formal。
R.D. （國際獵頭公司 Recruiter）：面試除咗要帶備相關學歷證明之外，如果某類工作需要 portfolio 都可以一同帶備。
Miss M （金融機構 HR）：最好帶齊學歷證書、著正裝，仲有準備好廣東話，普通話及英文作答。
5. 如果我有證書或者其他文件，需唔需要自行影印一份？
A sir （資深 IT Recruiter）: 通常 HR 會代為 scan文件，但自行影印定一份都無壞。
R 姐姐 （公營機構 HR）: 當然要啦。唔好預去到面試場地人哋會提供影印服務俾你！以前都見過好幾個例子，冇影印證書，去到面試場地亦冇提供影印服務。就算最後可以候補文件，印象分都大打折扣。
今日傾住咁多先！下次繼續探討搵工策略！
（文章由jobsDB提供，原文請按此：面試見工想改時間至放工後？HR 揭祕：5大搵工interview常見問題）
文章轉載自I am…青年職學平台
Comments