「一份工作，咩先係最重要？」作者其實有啲怕呢味討論，十居其九都會演變成冇乜營養嘅口水戰，然後就係阿A 講「我有個朋友」，阿B 講「阿叔初出道時呢點點點」，全部係瞎子摸象。
做得開心緊要啲，定係有發展空間緊要啲？廢話。首先，做得開心我當你自己主觀體驗到，但發展空間你自己點估？你以為入間初創好掂，點知三個月就執笠。
其次，任何呢啲「A 重要啲定 B 重要啲」嘅問題，之所以不切實際，係因為冇量化，就算冇量化都至少自己主觀感受下。等如你問：搵男女朋友，樣緊要啲定身材緊要啲？咁梗係兩樣都緊要。但你幾多顏值，換幾多身材走樣先？如果你係肥兩磅，換嚟李嘉欣咁樣同李嘉誠咁樣嘅分別，就梗係睇樣先啦。
所以上網拗一大輪「人工緊要啲定準時收工緊要啲」，好多時係廢的。多兩百蚊但做到趴街就梗係準時收工緊要啲，但多兩萬蚊而每日 OT 半個鐘我估好多人都制。
不過，認清咗以上盲點後，就可以討論到呢個問題，「咩先係最重要？」咁梗係樣樣都重要，睇取捨，但個思考方向係：有乜嘢係一般打工仔低估嘅；或者係作者身同感受，但回頭太難，知道已經太遲，想告誡新人嘅。
就只係兩樣嘢，唔好低估。當你想捨去呢兩樣嘢時，諗多次先。
第一，就係人工。王爾德話頭，後生時我曾經以為人工好緊要，而家老咗，發現果然係咁。記住係硬掘嘅人工，唔係其他 PERKS（津貼），唔係花紅。寫明在合約，每個月入你戶口，佢唔準時畀你可以告佢嗰啲。其他咩表現獎勵呀，友善工作環境呀，全部廢話。給我現金，其他免談。冇乜必要更加唔好減人工轉工，除非你係年薪（甚至月薪）球球聲嘅高級打工仔。
第二，好老細。不過唔及第一緊要。好老細係可以頂低啲人工，甚至低一截。但難度係：未拍過又點知個老細好唔好。當然跟住老細轉工最好，合作開。但即使同一個老細，去到新公司，或者假以時日，都可能變咗變態老細。至於何謂好老細？其實因人而異，但等於情人朋友咁，你對住佢你舒唔舒服，自己最清楚。鍾意無微不至但慈母多敗兒型嘅老細，定係暴君喜怒無常但教到你嘢嘅 CEO型，就睇你本身係咩人。係打份工定想更有野心。
至於其他嘢？都係次要，同埋好主觀，比較易習慣。梁啟超話頭，好大程度係主觀的心，唔係客觀的事。有成就感？你返得五年仲係好有成就感？同同事關係惡劣？可能根本你自己問題，轉去第間都係咁惡劣。唯獨係錢唔會呃人，你減咗人工，冇得拎啲滿足感去交租供樓的。
好老細都差不多，有好老細嘅，惡劣環境都頂得到，其他人唔妥你咪唔妥你。畀老細日日針對嘅，任你間公司點巴閉，你都唔會忍到好耐。
作者簡介：李聲揚 Ivan Li，金融機構研究部小主管。低級中產家庭出身，大西北長大，少年學霸。畢業後雙失年幾，見過百幾份工先有一份請。親身經歷減人工，被炒，跳草裙舞，炒人，減人人工，絶非紙上談兵。教過書，做過投行，最鍾意都係寫字。
Facebook Page：Ivan Li 李聲揚 - 華麗后台
文章轉載自I am…青年職學平台
Comments